سيد حافظ شاهه ’حافظ‘ حسيني

سيد حافظ شاهه ’حافظ‘ حسيني: سيد حافظ شاهه حسيني ولد سيد الهه بخش شاهه حسيني 22 فيبروري 1923ع تي ٽکڙ ۾ ڄائو. سندس تخلص ’حافظ‘ هو. سندس تعليم ۽ تربيت پنهنجي گهر کان شروع ٿي. مشهور شاعر حافظ ’دلگير‘ وٽ ٻه سال ديني تعليم حاصل ڪيائين. چئن درجن کانپوءِ حيدرآباد اڪيڊمي هاءِ اسڪول ۽ نور محمد هاءِ اسڪول ۾ پڙهيو ۽ بمبئي يونيورسٽيءَ مان مئٽرڪ پاس ڪيائين. 1951ع ۾ بي. اي (آنرز) ۽ ايل ايل بي پاس ڪري، ٽنڊي محمد خان ۾ وڪالت شروع ڪيائين. پاڻ وڪالت سان گڏ علم، ادب ۽ شـعـر ۽ شـاعريءَ سان به وابسته رهيو. ان سلسلي ۾ اداره سـنڌي ادب ٽنڊو محمد خان سندس سرپرستيءَ ۾ ڪافي تعداد ۾ ڪتاب ڇپايا.
حافظ شاهه جا ترجمو ڪيل ڪتاب ’تباهي‘، ’آئين زندگي‘ ۽ ’داستانِ غم‘ به ان اداري جا شايع ڪيل آهن.
حافظ شاهه ڪامياب وڪيل، سٺو نثرنگار ۽ بهترين شاعر هو. سندس شاعريءَ فني لحاظ کان تعريف لائق آهي. صحافتي ادب ۾ سندس ايڊٽ ڪيل رسالو ’لطف‘ به هڪ عمدو يادگار آهي. شاهه صاحب ڪيترن اهم ادارن جو قانوني مشير به رهندو آيو.
10 مئي 1974ع تي حيدرآباد ۾ وفات ڪيائين.

داخلا ۾ استعمال ٿيل تاريخون

1923.02.22  عيسوي

سيد حافظ شاهه حسيني ولد سيد الهه بخش شاهه حسيني 22 فيبروري 1923ع تي ٽکڙ ۾ ڄائو.

1974.05.10  عيسوي

سيد حافظ شاهه ’حافظ‘ حسيني 10 مئي 1974ع تي حيدرآباد ۾ وفات ڪيائين.

شاعر - ڀاڱي جون ٻِيون داخلائون